حديثي الولادة

اول شهر ماما واهم النصائح للتعامل مع المولود

كتير من الامهات منهم اللى على وشك الولادة خصوصا المولود الاول والتجربة الاولى محتارة هتعمل ايه اول شهر مع البيبى والدنيا متلخبطة معاها شوية هكتب المقال دة باللغة العامية عشان يسهل وصوله لاكبر عدد من الامهات الجدد

انا د.احمد واليوم اكلمك بصورة مبسطة جدا وبالترتيب عن احداث ما بعد الولادة مباشرة والمراحل التى يمر بها طفلك فى اولى ايامه

اول شهر ماما

اول شهر ماما

اولا -اول يوم واول شهر ماما

  • الولادة ان شاء الله لازم تكون فى مكان آمن ومنى آمن يعنى امان ليكى وللبيبى لو لا قدر الله حصل مشكلة ما يكون المكان على اتم استعداد وحاهزية للتعامل
  • يعنى مركز عمليات مجهز
  • بجواره محضن او حضانة مجهزة
  • يحضر طبيب الاطفال الولادة ومعه ما يلزم من ادوات وتمريض

    حضرتك ان شاء الله هتولدى طفلك الجميل

  • هستقبله انا طبيب الاطفال على ايدى
  • هحطه على التدفئة يتم عمل تدفئة وتشفيط ونحفيز للتنفس وتجفيف للبيبى وانا هسمعه بالسماعة واطمن عليه
  • روتينيا كدة اوا ما اطمن عليه هديله حقنة فيتامين ك ودى حاجة كدة وقائية بنديها لاى طفل عشان ما يحصلش نزيف ولتجنب حدوث سيولة فى الدم ودى بنديها فى غرفة العمليات قبل خروج الطفل
  • نضع الطفل على اكسجين انفى من نصف ساعة لساعة دة لو كان طفل طبيعى ولا يعانى من اى مشاكل اما لو كان يعانى من اية مشاكل فسيتم اخذ الطفل للمحضن والتعامل مع مشكلته
  • بعد التحفيف والتشفيط ووضع الطفل على اكسجين يتم اعادة تقييمه مرة اخرى من قبل الطبيب
  • هطمن عليه بالسماعة تانى
  • هقيس سكره
  • هختبر نشاطه ورضاعته
  • هختبر جهازة العصبى
  • هتفحص كل جزء فيه من اعلى الراس حتى اخمص القدم لاستبعاد اى عيوب خلقية والتأكد من سلامة جميع اعضائه
  • هخرج لحضرتك الطفل واكتبلك روشتة حديثى ولادة روتينية جدا فيها مطهر السرة ودة مهم علشان السرة بتتلوث بسهولة جدا وبيستخدم مع كل غيار للسرة وهو عبارة عن كحول ايثيلى مخفف
  • وفيها مطهر للعين ودة مهم عشان لا يحدث التهاب فى العين وكمان بتحل محل الدموع اللى بيبدأ افرازها بعد اسبوع وتشتغل هى مطهر بدل النقط
  • ومؤخرا تم اعتماد نقط فيتامين D من اليوم الاول بجرعة وقائية محددة من قبل الطبيب وله فؤائد كثيرة جدا اهمها يمنع نقص الكالسيوم ويساعد على النمو الذهنى والعضلى والعظمى للطفل بصورة طبيعية
  • نصائحى لاول شهر ماما

  • خرج من عندى هنصحك ب نصايح مهمة اولها لازم لازم الرضاعة الطبيعية المبكرة جدا خلال ساعات ما بعد العملية حتى ولو كميات قليلة هتكفى لان معدة الطفل لاتزال بحجم صغير
  • يتم حقن الطفل بمصل او تطعيم اليوم الاول HBV
  • هنصحك ما تديش اعشاب طبية ولا غيره ب اى حال من الاحوال لانها بتعمل انتفاخ ومغص وترجيع واحيانا اسهال وبتسرع زيادة نسبة الصفراء فى الدم
  • وبكدة الاعشاب بتضر اكتر ما بتنفع ويرجع الطفل بعدها بيومين يبكى بسبب المغص والانتفاخ بسبب الاعشاب
  • لو مقدرتيش ترضعى خالص ولسة البنج والجرح مأثرين خلاص بنضطر اننا نكتب لبن صناعى لفترة مؤقتة جدا لغاية ما تقومى بالسلامة وتبدأى ترضعى
  • وخلى بالك ان ما فيش حاجة ف الطب اسمها اللبن ينزل فى اليوم التالت – لبن السرسوب بينزل بعد الولادة مباشرة ودة لبن غنى جدا جدا بالاجسام المناعية المضادة اللى هتحمى طفلك من مشاكل كتيرة جدا بعد الولادة
  • لكن بعض الامهات تستطيع الارضاع والبعض الاخر لا يستطيع الارضاع فى اليوم الاول
  • لو اديتى لبن صناعى تغلى الببرونة كويس وتغلى المية كويس وتسيبيها تبرد وتحطى معلقة من اللبن على كمية 30 سنتى مية
  • وتنيمى البيبى على كتفك بدرجة 45 وتبدأى بسم الله ترضعى بالراحة وكل شوية تشيلى الببرونة من فم الطفل عشان ياخد نفسه
  • فى اول شهر ماما

  • اوعى توسعى ثقب الببرونة عشان دة هينتج عنه شرقان لطفلك
  • اوعى تلمسى حلمة الببرونة بالايد او تلامس الهدوم
  • ممنوع السكاتة تماما الا فى حالات معينة ونادرة ويكون بعد الشهر الرابع
  • بعد الولادة لازم للام انها تهدى وتنام فى غرفة ذات اضائة خافتة جدا عشان تعرف ترضع بدرى بعد الولادة
  • اول ما تقومى بالسلامة يا ست الكل وتنوى ترضعى تحطى البيبى برضه فى وضع 45 درجة وترضعى وتخليه يتمكن من حلمة الثدى جيدا حتى لا يسحب هواء ويحصل له انتفاخ
  • الرضاعة الطبيعية رضعة كاملة كل ساعتين ل 3 ساعات
  • تكريع الطفل فى نص الرضعى وفى اخر الرضعة لازم يكون عادتك
  • مساج طبيعى ومستمر لبطنه وضهره مع كل رضعة مهم وحاجة لطيفة بتنعكس سعادة على طفلك
  • اول شهر هتلاقى عياط كتير دون سبب دة طبيعى ودلع
  • العياط اللى بسبب انه يعيط بدموع او انه يكون فى تعبيرات وشه علامة تألم وغالبا بيكون مغص
  • الطفل ممنوع يرضع فى وضع افقى بتاتا يعنى ما يرضعش وهو نايم لازم يكون قاعد نص قعدة والام كمان ما ترضعش وهى نايمة علشان الطفل ما يشرقش
  • الغيار للحفاضة مع كل حمام ممكن اكتر من 7 مرات يوميا حتى لا يحدث التهاب حفاض
  • كذلك الشاور الدافى بماء فاتر كل يومين ل 3 ايام وكل الكلام عن منع الحموم اول اسبوع كلام خطأ
  • النوم الكثير للطفل اول شهر طبيعى هينام بالنهار ويصحى بليل دة عادى جدا وممكن لو عدى 4 ساعات تصحيه وتلاعبيه ويفوق ترضعيه ويرجع ينام تانى ما فيش مشكلة ان شاء الله

    بكدة نكون اتكلمنا عن اول شهر ماما لو فيه اى استفسار ابعتولى فى التعليقات وباذن الله ارد عليها كلها

قناتنا على يوتيوب

عن الكاتب

د.احمد عيسي

اضافة تعليق